RAPPORT MUNDIAL DI ALZHEIMER 2011 TA MUSTRA CU DIAGNOSIS TEMPRAN DI MALESA DI ALZHEIMER TIN BENEFICIO DI SALUD, FINANCIERO Y SOCIAL

September 16th, 2011

RAPPORT MUNDIAL DI ALZHEIMER 2011 TA MUSTRA CU DIAGNOSIS TEMPRAN DI MALESA DI ALZHEIMER TIN BENEFICIO DI SALUD, FINANCIERO Y SOCIAL

Yamada na tur Nacion pa Sostene Diagnosis y Intervencion Tempran

EMBARGA TE DIA 13 DI SEPTEMBER 2011 12:01 am ET (MERCA), 05:01 BST (INGLATERA)

New York y Londen, 13 di september 2011 – Rapport Mundial di Alzheimer 2011, publica awe pa Alzheimer’s Disease International (ADI), ta mustra cu tin
intervencion cu ta efectivo den e etapanan tempran di Malesa di Alzheimer -di cual algun por ta mas efectivo ora cuminsa mas tempran cu nan- y cu tin
un argumento economico fuerte na fabor di diagnosis mas tempran y intervencion na tempo.

Pa prepara e rapport, titula “Beneficio di Diagnosis y Intervencion Tempran”, ADI a encarga un comision investigado, bou di liderasgo di Prof. Martin
Prince na Instituto di Sikiatria di King’s College na Londen, pa redacta e prome rapport detaya y sistematico den historia, cu ta contene tur evidencia
cu por tin tocante diagnosis tempran y intervencion tempran di demencia.

Actualmente e gran mayoria di hende cu demencia ta haya un diagnosis laat den curso di nan malesa -si nan hay’e mes- cu e resultado cu tin un “bashi
den tratamento” substancial. Esaki ta limita grandemente nan acceso na informacion valioso, tratamento, cuido y sosten, y ta forma problema pa tur
esnan envolvi -pashent, famia, cuidador, comunidad y sistema di salud.

“No tin un solo manera pa yena e bashi den tratamento na nivel mundial”, Prof. Prince, e autor principal di e rapport, ta bisa. “Loke si ta cla ta cu
cada pais mester tin un strategia nacional pa demencia, cu ta promove diagnosis tempran y continuidad den e cuido posterior. Servicio di cuido
primario, centro diagnostico y di tratamento specialisa y servicio comunitario, tur ta hunga nan rol, pero na diferente nivel, dependiendo di e
recursonan.”

“Fayo pa diagnostica Alzheimer oportunamente ta representa un oportunidad tragicamente perdi pa mehora calidad di bida di miyones di persona”, Dr.
Daisy Acosta, Presidente di ADI, a laga sa. “Mas cu tur cos e ta haci e reto di salud, social y financiero, cu ya ta masivo globalmente, mas grandi
ainda. Nos ta spera di mira e reto aki den foco di interes den e Cumbre di Nacionnan Uni tocante Malesanan No Comunicabel cu ta tuma luga otro siman.”

E rapport nobo di ADI ta revela lo siguiente:

  • Tres cuarto parti di e 36 miyon di hende calcula cu ta biba cu demencia mundialmente no a haya
    un diagnosis y, consecuentemente, no por beneficia di tratamento, informacion y cuido. Den e paisnan cu entrada halto solamente 20-50% di e casonan di
    demencia ta reconoci y documenta den cuido primario. Den e paisnan cu entrada abou y medio e proporcion aki ta apenas 10%.
  • Fayo pa diagnostica frecuentemente ta resultado di e pensamento eroneo cu demencia ta un parti
    normal di biehes y cu no por haci nada pa remedi’e. Net contrario, den e rapport nobo ta sali na cla cu intervencion por haci un diferencia, te hasta
    den e etapanan tempran di e malesa.
  • Intervencion cu remedi y testnan sicologico pa hende cu tin demencia den un etapa tempran por
    mehora conocemento, independencia y calidad di bida. Sosten y conseho na e dunadonan di cuido por mehora estado di animo, reduci tension y retrasa
    institucionalisacion di hende cu demencia.
  • E gobiernonan, preocupa pa e gastonan creciente di cuido na termino largo relaciona cu demencia,
    mester “inverti awor pa spaar despues”. Basa riba un estudio di analisis economico e rapport ta calcula cu diagnosis mas tempran por genera un
    spaarmento di te US$ 10,000 neto pa pashent den e paisnan cu entrada halto.
  • “Durante e aña cu a pasa e team investigado a analisa miles di estudio cientifico cu ta
    elabora riba impacto di diagnosis y tratamento tempran y nos a haya evidencia pa por sugeri beneficionan real pa pashent y dunado di cuido”, Marc
    Wortmann, Director Ehecutivo di ADI, a trece padilanti. “Diagnosis mas tempran tambe por transforma diseño y ehecucion di e pruebanan clinico pa
    test tratamento nobo. Pero prome cu esey nos mester ta sigur cu hende tin acceso na e intervencionnan efectivo cu ya ta proba y disponibel, loke ta

    nifica cu e sistemanan di salud mester ta prepara, getrain y capacita pa suministra diagnosis oportuno y preciso, comunica cu sensibilidad y cu e
    sosten apropia.”

Pa tal fin ADI ta recomenda pa cada pais tin un strategia nacional pa Alzheimer/demencia cu ta promove diagnosis y intervencion tempran. Mas
specificamente, e gobiernonan mester:

  • Promove competencia basico cerca e mediconan y otro profesionalnan di cuido di salud den
    deteccion tempran di demencia den e servicionan di cuido primario.
  • Crea, caminda ta factibel, redanan di centro diagnostico specialisa pa confirma diagnosis di
    demencia den un etapa tempran y formula plannan di maneho di cuido.
  • Aplica, den situacionnan cu poco recurso, e normanan desaroya recientemente pa Organisacion
    Mundial di Salud (WHO) pa diagnosis y tratamento inicial door di trahadonan den cuido di salud cu no ta specialisa.
  • Notifica e disponibilidad di intervencionnan basa riba hecho, cu ta efectivo pa mehora funcion
    cognitivo, trata depresion, drecha estado di animo di e cuidador y pospone institucionalisacion mas tanto posibel.
  • Aumenta inversion den investigacion, specialmente pruebanan di control arbitrario pa test remedi
    mas prome y durante periodonan mas largo; tambe pa test eficacia di e intervencionnan cu relevancia particular pa demencia den un etapa tempran.

Tocante demencia y malesa di Alzheimer

Demencia ta un sindrome cu por wordo causa pa varios trastorno progresivo cu ta afecta memoria, pensamento, comportacion y e habilidad pa efectua
actividadnan di tur dia. Malesa di Alzheimer ta e causa mas comun di demencia. www.alz.co.uk/about-dementia Di acuerdo cu Rapport Mundial di Alzheimer 2009 ta pronostica cu e
cantidad di hende cu demencia casi lo redobla cada 20 aña -di 36 miyon na 2010 pa 115 miyon na 2050. Di acuerdo cu Rapport Mundial di Alzheimer
2010 e gastonan relaciona cu demencia a totalisa US$ 604 mil miyon, mas o menos 1% di e Producto Nacional Bruto (PNB) Mundial.

September 2011 ta e prome Luna Mundial di Alzheimer den historia. www.alz.org/wam/wam.asp.

Tocante Rapport Mundial di Alzheimer 2011

Rapport Mundial di Alzheimer 2011 ta disponibel na www.alz.co.uk/worldreport2011 , hunto cu e rapportnan publica den e añanan anterior.

Alzheimer’s Disease International (ADI) ta e federacion internacional cu ta agrupa 76 asociacion/ organisacion di Alzheimer (incluso F.A.A.), cu
ta sostene hende cu demencia y nan famianan den nan respectivo paisnan. Funda na 1984, ADI ta opera como un reda di asociacionnan di Alzheimer rond
mundo pa comparti y intercambia informacion, recurso y experticio. Su vision ta “un miho calidad di bida pa hende cu demencia y nan famianan”. ADI tin
su base na Londen y ta registra como un organisacion sin fin lucrativo den estado di Illinois. Pa mas informacion, bishita www.alz.co.uk.

Fundacion Alzheimer Aruba ( F.A.A.):

E meta di e Fundacion ta: Halsa consenshi publico tocante e malesanan neuro-cognitivo di e tipo Alzheimer y sostene e personanan cu ta sufri e malesa
aki y nan dunadonan di cuido.

RECURSO

Colabora cu agencia-, institucion- y/of organisacionnan na Aruba of otro caminda, cu tin un meta similar of relaciona cu:

  • Presta servicio di sosten practico y emocional;
  • Suministra informacion y duna conseho;
  • Sali na defensa di Alzheimer y conseha Gobierno;
  • Duna training tanto na cuidador como na profesional;
  • Encurasha y sostene diagnosis y tratamento tempran;
  • Desaroya modelo pa cuido progresivo;
  • Representa e interesnan colectivo di e pashent (nan) y su/nan cuidador(nan);
  • Haci uzo di tur otro medio legal cu por yuda of promove realisacion di e meta(nan) fiha.
zp8497586rq