Demencia tipo Alzheimer: Maneho y Cuido (PARTI -1)

May 31st, 2011

Tur hende un dia por enfrenta cu un ser keri cu ta sufri di un of otro sorto di demencia. Nos comunidad ta carece di mas informacion di e demencianan aki.

Fundacion Alzheimer Aruba (F.A.A.) ta ricibi masha hopi yamada di famia / cuidadornan di e pashientnan aki cu preguntanan manera entre otro:

  • Pakico e persona cu demencia ta cambia di comportacion y no ta su mes mas manera nos conoce? Ta zundra, insulta, sconde obhetonan, perde placa of
  • Simplemente preguntanan manera kico ta pone cu e persona aki ta comporta su mes di tal forma?
  • E maneho di cuido na cas y e peso riba e cuidador: con tene cuenta cu esaki?

E charla aki ta hustamente pa e personanan cu kier sa mas di e desaroyo di e malesa aki y kico por haci den e diferente casonan cu nan ta (of posiblemente den futuro nan por) enfrenta durante e desaroyo di e malesa aki serca un ser keri den nan ceno.

Aki na Aruba tin hopi caso di personanan cu ta sufri of ta bay sufri di e malesa aki y esaki ta birando cada aña mas y mas. Segun estadistica di entre otro Unesco, e malesa aki lo triplifica na aña 2025 si no haya un cura pe pronto. Ya ta ser prognostica pa scientificonan cu riba nivel mundial e malesa aki ta bai forma un epidemia den e proximo 20 aña dilanti di porta.

Pesey ta na su luga pa nos comunidad amplia su conosemento riba e malesa aki, pasobra e malesa aki no ta discrimina ni den edad ni den clase social.

Tur escases di informacion tocante e malesa aki ta haci cu tin mal comprendemento encuanto e pashient y e consecuensianan (stress, rabia, maltrato, depresion, etc.) cu esaki por trese cu ne serca e cuidador(nan).

Ora un cuidado, famia of conosi di e pashient comprende e actitud di un persona cu ta sufri di e malesa incurabel aki, e por deal miho cu e situacion di cuido na cas. Ta bini aserca cu e conosemento di e materia aki ta haci cu e stress cu e cuidador por confronta cu ne durante cu e ta maneha cu un pashient asina ta bira menos.

Den e famianan unda tin por ehempel un Padushi, Madushi, Tanta of Omo cu ta un pashient, un mucha tambe por wordo influencia si tin cambio di actitud serca un persona mayor. E mucha aki por sinti incertidumbre pa e ser keri cu un tempo e tabata aprecia y respeta hopi y awo a cambia y a bira un persona cu un comportamento 'straño' pe. Hasta e preocupacion aki por stroba su desaroyo na skol. Den e casonan aki F.A.A. ta sali for di e punto di bista cu ora un mayor, maestro, etc. sa mas di e malesa aki, e por splica e mucha aki miho ta kico ta pasando y asina kita e miedo of incertidumbre aki serca e mucha, ya cu e mucha aki tambe lo compronde mas di e pakico su ser keri ta (of a) cambia di actitud.

Durante di e charla aki publico por haci pregunta por escrito of verbal.

E Topico di e charla: Demencia tipo Alzheimer: Maneho y Cuido (PARTI -1)

Fecha: diamars 31 di Mei, 2011
Ora: 8:00 – 10:00 di anochi
Lugar: Centro di Bario Playa Pabao
Idioma: Papiamento
Oradornan:
drs. Melva Croes-Yánez (neuropsicologo)
Sr. O’neil Romero (C.E.O. Romero Home Health Care Services)
Sra. Letisia Ramautar-Rasmijn

Entrada: Gratis

Considera e invitacion na e charla aki como uno personal.

Comision di Actividad di Fundacion Alzheimer Aruba
Tel/fax: 5821684 / 5929528

zp8497586rq