Riba dia Mundial Contra Abuso di Anciano Diaranson 15 di juni

June 14th, 2011

Kico ta abuso di un Anciano?

Bo bisiña Marienchi pa hopi aña cada mainta di nobo ta deseabo y tur cu ta pasa dilanti di su cas un bon dia ora e sali pa cuminsa bari dilanti porta di su cura. Marienchi semper ta gusta combersa y ya ta un custumber cu muchanan cu ta pasa dilanti su cas pa bai skol por premira tur dia di nobo cu Marienchi ta duna nan su mensahe y ta bisa ‘corda haci bo best na skol’.  Awemainta abo a nota cu Marienchi a cumindabo na un forma diferente y e ta parse un poco bruha… awe e ‘Bon dia’ di custumber a zona fuera di custumber y na su expresion bo ta ripara cu e no a reconoce bo. E muchanan tambe a drei wak y a nota cu Marienchi no a cumindanan manera di custumber. Bo ta yega serca y bo ta observa cu e tin un herida y un pleki blauw na su brasa. Bo ta puntra Marienchi kico a pasa cu su brasa. Mesora e ta bira alerto y ta contestabo ‘ah, esey no ta nada serio; djis un accidente chikito, mi a stoot contra e kashi di banjo’..y e ta bisa ayo y ta drenta su cas y ta sera e porta… abo ta keda pensativo pa su comportacion y e herida y pleki blauw na su brasa… y bo ta purba consola bo mes cu e pensamento…Marienchi tin su edad caba, podise ela cuminsa cu demencia… y bo ta keda bisa bo mes..tin algo cu no ta klop…

E momento cu un anciano bira mas y mas fragil y debil, e ta fysicamente menos capas pa defende su  mes contra intimidacion, asalto, atraco, etc. Hopi biaha e anciano aki no por mira y/of tende bon mas manera antes y e por bira victima di personanan sin escrupolo cu lo probecha di dje y di su  condicion. Hopi ta e casonan mundialmente conoci, unda cuidadornan (na cas y/of den instituto) di un anciano, cu of sin demencia, ta abusa y/of perhudica e anciano.

Ta conoci cu anualmente miles di kehonan ta drenta cerca autoridadnan, mientras cu miyones di e casonan aki (pa diferente motibo) no ta ni wordo raporta.

Unda abuso di e anciano sa tuma luga?

Abuso di un anciano ta tuma luga unda e anciano aki ta biba/hospeda; mayoria di e abusonan aki ta tuma luga door di jiunan adulto, un miembro di famia, nieto, casa di e anciano y den e vivienda di e anciano aki. Tambe den institutonan unda e anciano ta residencia pa un tempo largo  por ta fuente di abuso contra e anciano. Awendia abuso tambe ta tuma luga riba caya, mediante atraco, etc.

Algun abuso di anciano

 

Abuso fysico (dolor, lesion, asalto, dal, golpia, morde, kinipi, skop, pusha, mara na cama/stul, lage pasa hamber, dunele cuminda no saludabel of dañino pa su salud, forsa pa guli cuminda, etc.).  Tambe abuso fysico ta ensera uso di remedi inadecua, isolacion of restricion. Tur e actonan aki ta sosode intencionalmente.

Abuso Emocional/Psicologico

Verbal: Expresionan intencional pa causa dolor emocional of angustia: papia grocero,  grita, isulta, menasa, humilia, ridicula, culpa, etc.

Abuso no verbal: Esaki ta consisti di entreotro: ignora e anciano, isola e anciano di amigonan of actividadnan cu e ta gusta haci, terorisa, spanta, menasa e anciano.

Abuso Sexual

Esaki ta contacto sexual cu un anciano sin su consentimento of bou manipulacion. Esaki tambe ta ensera acto sexual fysico, mustra e anciano potretnan of articulo material pornografico, forsa e anciano mira material pornografico of actonan sexual,  forsa e anciano pa kita paña of mustra partinan priva di su curpa, etc.

Negligencia of abandono pa su cuidadornan

Negligencia di un anciano, no cumpli cu e obligacion di su cuido (esaki ta consisti di 50% di casonan di abuso cu ta ser raporta). Esaki tambe ta ensera negligencia of abandono activo (intencional) of pasivo (no intencional: basa riba factornan manera ignorancia of  simpelmente nenga cu un anciano mester di e cuido necesario).

Explotashon Financiero

Esaki ta ensera uso no autorisa di fondonan y/of propiedadnan di un anciano pa cualkier persona.

Un cuidado of persona sin escrupolo por:

  • Malusa un anciano su check, carchi di credito, cuenta bancario, etc.
  • Horta placa efectivo, placa di pension of otro ingresonan, realoca articulonan/ productonan domestico, etc.
  • Falsifica firma di e anciano
  • Robo di identidad

Crimen organisa contra ancianonan ta ensera entreotro:

  • Anuncia cu un persona a gana un premio y ora e anciano bin reclama su  premio y  exigi cu e mester paga pa ricibi e montante gana.
  • Pidi placa pa causanan comunitario fictisio
  • Inversionan frauduloso

Fraude y abuso di anciano den salubridad

Esaki por ser efectua pa dokternan, verpleegsternan, personal den hospital, y otro  proveedornan di servicio cu tin haber cu salubridad di e anciano y cu no ta tuma ‘etica’ na serio.

Algun ehempel di fraude den salubridad y abuso contra un anciano ta ensera:

  • No duna e servicio necesario na un anciano, pero si cobra pa esaki
  • Cobra dobbel pa un servicio  of cuido medico.
  • Soborno: ricibi pago of servicionan pa doorverwijzing na otro proveedornan di servicio medico of pa prescripcion di remedi.
  • Sobre of baho medicacion / diagnostico
  • Fraude cu remedi: Recommenda remedi bou pretexto pa un cura di un of otro malesa of condicion.
  • Laga ancianonan warda pa oranan largo den consultorio.
zp8497586rq