Vision y Mision

‘Fundacion Alzheimer Aruba’ ta afilia na ‘Alzheimer Disease Internacional’ (ADI), e organisacion mundial cu ta cubri e organisacionnan nacional di e paisnan afilia. Na su turno ADI tin relacionnan oficial cu World Health Organization.

Tambe F.A.A. ta afilia na ‘Alzheimer Ibero-América’ (AIB), e red di fundacionnan di habla Spaño cu ta trata di uni e asociacionnan nacional di Alzheimer den Caribe, Centro y Sur America y Spaña.

Fundacion Alzheimer Aruba a ser funda door di iniciativa di Melva Croes-Yánez na aña 2003.

Un Tiki di Historia di F.A.A.

Despues de su graduacion riba tereno di neuropsicologia na Universidad di Tilburg, Hulanda, y a regresa Aruba na 1990, drs. Croes-Yánez a experiencia cu tabatin masha poco informacion na disposicion di e comunidad riba e tereno di trastornonan neurocognitivo (tipo Alzheimer) na Aruba. Mescos cu hopi otro luga na mundo, Aruba tambe a conoce un epoca den cua hende ta pensa cu e trastornonan aki ta un fenomeno “normal” di personanan mayor di edad. Na Aruba e temponan ey tabata papia di “verkalk” of “kinds”. Tabata pasa tambe cu ora un persona hoben tabata mustra sintomanan di trastornonan neurocognitivo, e tabata ser mira como un persona “loco”.